ສະຖານທູດຈີນ ປະຈຳລາວ ມອບເຄື່ອງຊ່ວຍເຫລືອ ໃຫ້ກະຊວງ ການຕ່າງປະເທດ
ຂປລ. ພິທີ ມອບ-ຮັບ ເຄື່ອງຊ່ວຍເຫລືອ ຈາກສະຖານ ເອກອັກຄະລັດຖະທູດ ປະຈຳ ສປປ ລາວ ມອບໃຫ້ແກ່ ກະຊວງ ການຕ່າງປະເທດ ຈັດຂຶ້ນໃນວັນທີ 24 ມິຖຸນາ 2016 ໂດຍທ່ານ ກວນ ຮົ່ວປິ່ງ ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສປ ຈີນ ປະຈຳລາວ ເປັນຜູ້ມອບ ແລະ ຮັບໂດຍ ທ່ານນາງ ຄຳເພົາ ເອີນທະວັນ ຮອງລັດຖະມົນຕີ ກະຊວງການຕ່າງປະເທດ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມເປັນສັກຂີພິຍານ.
ການຊ່ວຍເຫລືອຄັ້ງນີ້ ມີພາຫະນະຈຳນວນ 2 ຄັນ ແລະ ອຸປະກອນຮັບໃຊ້ ຫ້ອງການຈຳນວນໜຶ່ງ ເພື່ອເປັນການສະເຫລີມສະຫລອງ ວັນສ້າງຕັ້ງ ສາຍພົວພັນການທູດ ລາວ-ຈີນ ຄົບຮອບ 55 ປີ ທັງເປັນການ ປະກອບສ່ວນສຳຄັນເຂົ້າໃນ ການຊຸກຍູ້ການປະຕິບັດ ວຽກງານ ຂອງກະຊວງ ການຕ່າງປະເທດ. ອຸປະກອນດັ່ງກ່າວ, ຈະຖືກນຳໃຊ້ເຂົ້າໃນ ການປະຕິບັດວຽກງານ ຂອງກະຊວງ ການຕ່າງປະເທດ ເພື່ອຊຸກຍູ້ສົ່ງເສີມ ການພົວພັນ ຕ່າງປະເທດ ເວົ້າລວມ, ເວົ້າສະເພາະ, ແມ່ນເພື່ອເສີມຂະຫຍາຍ ການພົວພັນຮ່ວມມື ລະຫວ່າງ ສປປ ລາວ ແລະ ສປ ຈີນ.
ໃນໂອກາດດັ່ງກ່າວ, ທ່ານນາງ ຄຳເພົາ ເອີນທະວັນ ໄດ້ສະແດງ ຄວາມຂອບໃຈ ຕໍ່ລັດຖະບານ ສປ ຈີນ ກໍຄື ສະຖານເອກອັກ ຄະລັດຖະທູດ ປະຈຳ ສປປ ລາວ ທີ່ຍາມໃດກໍເປັນຫ່ວງເປັນໃຍ ໃຫ້ການຊ່ວຍເຫລືອ ສປປ ລາວ ມາໂດຍຕະຫລອດ ອັນໄດ້ເຮັດໃຫ້ສາຍພົວພັນ ລະຫວ່າງ ສອງປະເທດ ໄດ້ຮັບການເພີ່ມພູນ ຄູນສ້າງຍິ່ງໆຂຶ້ນ.
ທີ່ມາແຫຼ່ງຂ່າວ: ສຳນັກຂ່າວສານປະເທດລາວ
